Addiu a li cibi sani,
addiu a li tempi belli,
sentiti chi pensaru
ddhi … di Brusselli…
No cchjù granu pe’ pani
né carni pe’ pruppetti,
pe’ fari l’uni e l’attri
si pistanu l’insetti!
Però si cu l’insetti
si faci la farina,
mi schiantu pe’ mi mangiu
biscotti la matina.
Mi schiantu pe’ mi mangiu
la pasta a menzijornu
per casu non m’è fatta
cu carchi papatornu[1].
(Poetica licenza
-non vogghju mi li mbuscu-
lu sacciu puru eu
ca esti nu molluscu).
Mi schiantu pe’ mi mangiu
la sira la pastina
non m’esti un derivatu
di musca cavaddhina.
P’ognuna di ddhi cosi
ch’eranu tantu bboni,
d’insetti porcarusi
ora nc’è la versioni.
Pe’ un bonu sostituto
di lu pani integrali
nci vonnu li formiculi
mbrischiati cu cicali.
Nci voli pe’ li frisci
mi veninu crocccanti
na bella filandera[2]
ma la parti d’avanti.
Si vi voliti fari
na tazza di cafè:
nu bellu surrogatu
cu la musca tsè-tsè.
E mbeci pe’ lu tè
Nenti cchjù busticeddha,
nci vonnu ali pistati
di na caterineddha[3].
Pe’ farina fumanti
tazza di ccicculata,
na bella lamburida[4]
però quand’è stutata.
Non jamu cchjù a li longhi
e la chiudimi ccani:
l’insetti, capiscimmu,
su cibi quotidiani.
Ma mi ndi ribbellamu
daveru vinni l’ura:
l’insettu ndi nnasija
pe’ leggi di natura.
Chi sunnu sti schifezzi?
Chi cibi sunnu chissi?
“Mangiatili!”, ndi dinnu,
“L’Europa ndi lu dissi!”
Ddhi … di Brusselli
non ndannu chi mi fannu
e fannu leggi stupidi
e sempri a nosciu dannu.
A sti leggi cretini
non ndai pe’ mi ti bbuzzi,
non si mangia la pasta
si nc’ennu li papuzzi[5]!
Japrimu li mulini
chi ndi restaru chiusi.
L’insetti mi li mangianu
ddhi quattru porcarusi.
Pe’ nui nci voli l’orgiu,
jermanu[6] e la majorca
alla facciazza …
di chist’Europa … !
Francesco Borrello
[1] Chiocciola.
[2] Mantide religiosa.
[3] Coccinella.
[4] Lucciola.
[5] La papuzza è il punteruolo del grano.
[6] Segale.
