Ridotta la pena a Mimmo Lucano, reo di aver creato una comunità globale integrando nella debole economia del suo paese, un gruppo di disperati extracomunitari sbarcati dal mare.
FU LU VENTU
Fu lu ventu chi li portau ndi tia,
ḍḍu ventu sciroccusu dill’estati,
ti li trovasti com’a na majia,
na frott’e cent’e cchjúni disperati.
Misereḍḍi venuti di luntanu,
cu na speranza urtima a moriri,
picciul’e grandi tutt’a man’a manu,
niri di facci e di malu patiri.
E tuni figghju di sta’ terra dura,
ancora friscu di lu to’ migrari,
tu chi sentivi in corpu la sudura,
di chiḍḍi anni for’a travagghjari.
Ti vinni nu penseru assai palisi,
sta’ genti chi lu ventu ti portau,
pot’esser’a ricchizz’e stu’ pajsi,
ca puru lu Signuri bbandunau.
E fu cusì ca cu lu to’ pensari,
lu jancu fici rota cu lu niru,
si risentìu pe strati lu vuciari,
nte vicul’i putihji riapriru.
Ma undi ti nescìu stu raggiunari?
Non fu graditu cert’u to desiju!
Li legg’i ll’omu non sann’a cangiari,
non simu figghji di lu stessu Ddiu!
Ḍḍa luci chi ḍḍumasti la stutaru,
ma li to’ lotti non ndann’a moriri,
li cortivamu intr’o cori paru,
stu’ mundu prim’o poi ndav’e capiri.
Rocco Criseo
